Do Nemdi

Mani hambal wazhdeli pa taw chó basshámi jodhá gwárát!

Tai mehr o dóstiá sarréchén nemdi pa mani nezzá cha darnagayb atkagén wazhdel o shádániay sawgáté at ke mani gimortagén dely bód áort. Maná omét nabutag ke pa mani hoshk o talkár bastagén lonthán choshén zarrén kaddahé cha shir o shakkalá porr bit o kayt ke é porsózmánén delá chó katrá sárt kant. Man ranj o andóháni gahgirén kométay sarkóndháni démá béwas etán ke tai dorrén gálán maná zehént. Tai har gálé jetá yakk zahrhawárén shirkenén tránagéá goláésh at ke may hardoénáni del mán eshiá sharidár ant.

Dér ent ke cha man bétránag butagay. Tai é nemdiá pa hamdardén delán gam tálán kanókén dawr o bárigé bongéj kort ke chó nakotthókén hastiá cha bégwáhiá nazántkár bát.

Taw mani gégán geptagant o wati bétáhiri sahrá kortag. Chó nazánay ke bémayáráni chammán gonáh, mayár o póléngiay daryáyá ózhnágén mardéay dósti, tai chó shirá espétén baddhay cháderá ham póleng kant agan taw pa proshtagén kalát, tóstagén ás o bortagén bandá bétáhir ay, é tai wati wájahi ent ke chammay dóstiá chammay jágah ham tará dóst ent.

Mani jáwaray jostá makan ke cha taw hazár o panchsad mil dur yakk drájborrén kangéay mayár án ke Éránay mazanhawray morwáredbakshén rózhnáén ápay torsnák o mehrbánén kotthá trappal ent. Edá gón man béke gwastagén jagarborrén tránagán dege mál o maddhi nést.

É gappá taw wat ham zánay ke é bézendén del abayd cha zendmániá dege bémayárén ranj o andóháni mulén dawárjáh ent ke pa degerán maná hecch rangá shát nabit. Man bezántén ke taw pa man jwánié kort kanay man gón har nemdiá delay yakk thokkoré dém dátagat. Bale zánán ke gón man dazmadat buag cha tai dazrasá ham dur ent.

Tránag o yátáni jostá makan ke é del róché do sad bar trakkit o cha ars o oppárán rand yaddamáné trahit bale har damán padá chó gwánzagi chokká gerr bandit ( ke agan yakk bélé ham bétránag bebit wasshi magendát). Taw angat jódh ay ke do tramp ars réchay o wati delá sobakter kanay, bale edá yát kan ke é delay arsáni némé wa gránmáwaláni daynán retkag o dege némé cha bretkagén delay sózmáná dut butag o áh o oppáráni rangá bály kortag. Yakk trampé ars mán é sajjigén delá pasht nakaptag ke cha hoshk o kahnigén chammáni rahá pa Balóchiay bécháderén baddh o ridh ridhén shalwárénká beréchán. Bale pa sigay dáragá yakk bretkagén delé ham báz ent.(agan dardwáré).

Kóndháni jágah delay sar ent, dard o dór wati dawárjáhá sharr zánant. É do sad bar proshtag o chálk kortagén del pésará kádháni béreyáén kaddahén chamm o áski didagáni zumsarén góndóchán dótkagat. Annun padá Balóchiá wati talárborrén sagár o zahrshánén kamánáni ámách kortag.

Taw chó maná del nabay ke yakkén randá gón wati bésitén gamán tai wazhdelén zerdá tahlián dawr bedayán. Pa é diwáná inchok bass ent. Démteri majleséá padá gón taw hamzán bán. Dráh bátay.

Mani sangat, wasshiáni mangirán bátay!

Tará tai nókén polláni hazzám do sad bar morád bát o wassh o wazhdeli wati chárén róchán bogwázénátay. Pa shomá é kár arzán ent parcháke shomá cha á Shayh Moridán naet ke gón yakk Hániéá delá bebandet, bale bandikay sar mani gár ent ke ásomi poll o garki taláni bágay tahá del angat ham gón Hánolá ent.

Taw Hánolay dorrén nám wati béganjén nemdiay sepáh kortag o mani ázagén thapp padá kodéntag. Taw Dordánagay gapp jatag bale pa eshtápi.

Nazánán tai morád pa mani zerdá ché ent o nazánán ke chetawrén gránén moshkolé pa man dast janag lóthay ke taw wat ham nazánay ke pa man sut ent ke táwán.

Drostán o sári man tará goshán ke har rangéá ke bebit mani Hánol ent. Áiay choshén jáwaray eshkonagá mani del sad thokkor bit. Áiay dósti mani delá hamá wahdi yalah dant ke dastay del poth byárit. Hánol agan yakk syahmáré bebit o wati zahrán pa maná shát bekant manesh chó shir o shakkalá nóshán. Hecch rangén sekén, hecch dhawlén gapp o hecch dábén goptáré Hánolá cha mani delá bort nakant. Agan rózgáray drostén zór o zabardasti, honop o hilah o repk o honar yajjáh bebant á chó ke hamá marday padán ant ke tayábkerrá tarrit o har gwarmé ke kayt áiay padán gár kant o rawt. Anchóke é tayábkerrá hecch pad pasht nakapit hamé dhawlá mani delá hecch choshén chizé jágah kort nakant ke Hánolay wáhag póleng bebit. Hánolay wáhag chó hamá gwarmá ent ke mani delay tayábkerrá degeráni padán gár kant o padá mán dóstiay nilbómén zerá rawt o hamé pólengián shódit.

Mani del pa áiay golén dróté o zarrén kolawéá band ent. Taw do bará distag o chár gál ham per bastag bale taw cha é gappá bétránag butagay ke taw pa rabbálawi shotagay. Man nazánán ke ché nebeshtag bekanán. Yarrandé man padá tará goshán ke Hánol agan hoshkén dár o potkén hóshagé bebit ham pa maná sabáhay saray pach polletagén tázagén gol o anguray payápén dánagáni hólombé. Man wati tonnagén lontháni sárt o hónakkén kahnigá pa é gappá angár kort nakanán ke áiay chammag zórákén dawray natorsókén róchay sóchókén tabdá hóshéntagant. Mani zyáratjáh eshk o wáhagay hamá sotkagén angaráni jal ant k cha áyán dege nókén zendmánié jódh but kant ke maná ham gón wati danzán gár kant.

Hánolay hamé hoshk o talkár bastagén lonth(ke áyáni badalá mani delay hón hoshk bátant) angat ham mani tonnay próshók o haláhóshay gár kanók ant. Hánolay shengén mahpar angat ham mani sará sáhél ant. Drégatén mani ásén delay dar atkagén oppáráni dut pa áiá beraseténant. Man pa áiá zarán. Pa áiay gáléá rahchár o kolawéá chamdár án. Man bezántén ke taw é redá gón man hamdast but kanay man tará goshtagat ke cha áiá josté beger. Bale zánán ke tará béke mani thappáni kodénagá dege hecch chiz delgósh nakant.

Tai dege jostáni bárahá man pa passawá óshtátagán bale goddh cha golay gappá dege chiz tám nadant. Pa dege gapp o tráná démterá majles o diwán pa zendagéná báz ent.