Loading...
Padá per gashtagant shap máhekáni
Padá yát atkag mahrangén donáni
Man zánán gwát chamá kollá shegwastag
Do róch ent bó ent hir o pópaláni
Sar o chammán ant ás o angarén chamm
Ke sawgát ant béwábén shapáni
Cha róché ke amol pa man dar atkag
Habar gishéntagy gránmáwaláni
Matorsénet maná andóh o ranján
Ke báron kasshetag gránén gamáni
Mani arwáhay raptárán hazénit
Golén Hánol kehéb o loddhagáni
Tai áski didagáni mennatwár ant
Mani baht o syáhi kanjaláni
Mani námá gón harkassá* gerán ent
Hasaddá gésh kant jawrén badáni
Del o chammáná ráhá chér géjet
Sepáh pédák ent diwán o srapáni
Masitá ham nazánán kay maná bárt
Tai borwán ke mehrábay kamáni?
Bechar pa émeni sabzén bahárán
Mani lassáén áhug bédeháni
Makasshát pa tará garmén lewáré
Zarókén mórt o thithal sarshamáni
Kojá á shahdgálay bénagén lonth
Kojá é kaddah shir o shakkaláni
Sayad átár o sárt ent gwát, zánán
Ke gol pédák ent mesk o ambaráni